Historiku i gazetës “Pravi Put” (“Rruga e drejtë”), fillon me daljen në dritë të numrit të parë më 22 janar të vitit 1937 në Shkup, e cila dilte 4 herë në muaj dhe atë çdo të premte. Kjo gazetë ishte organ i Shoqatës së Imamëve të Xhematit të Ulema Mexhlisit të Rrethit të Shkupit. Redaktor përgjegjës i saj ishte Hafiz Ramiz Paljevac, ndërsa adresa e redaksisë ishte në rrugën: “Hafiz Pashina” numër 6. Gazeta shtypej në shtypshkronjën “Bratstvo”, e cila gjendej në rrugën: “Kraljeviqa Marka” numër 28 në Shkup. Artikujt që kanë të bëjnë me shkollat janë të paraqitura në një fejton në 8 vazhdime (mungon numri i parë) me titull: “Edukimi fetar sipas legjislacionit të ri të Bashkësisë Fetare Islame”, tekst i redaksisë, “Shkollat islame, kultura dhe iluminizmi në mesjetë”, me autor Idriz Shahmanoviq; artikulli me titull: “Medresetë e prapambetura”, me autor Zufer Musiq; “Kundër mbylljes së medreseve të prapambetura”, me autor Ibrahim Lutviq; artikulli me titull: “Shoqata dhe shkolla – Shefkat në Shkup”, pa autor; dhe artikulli me titull: “Buka, pastaj shkolla”, me autor Muhjudin Sulejmanpashiq.