Me anë të këtij punimi shkencor, kam prezantuar rolin dhe peshën historike që ka luajtur periodiku islamë në përgjithësi e revista “Kultura Islame”, në veçanti atë kohë trazirash, furtunash e vlimesh politike që karakterizohej gadishulli ballkanik. Ky punim shkencor bashkëkohor mbetet e lidhur shumë ngushtë me kahet e zhvillimeve të sotme të kombit tonë dhe të kulturës islame e shqiptare, ndaj, si e tillë, është një arsye shtesë e përzgjedhjes së saj. Qëllimi kryesor është njohja objektive e rolit që kanë luajtur shtypi dhe periodiku fetar në aspektin e formimit të drejtë islam, kulturor, arsimor, shoqëror e kombëtar të shqiptarëve në gadishullin ballkanik. Duke hulumtuar numrat e kësaj reviste hasim artikuj ku çmohen e vlerësohen harmonia, toleranca, bashkëjetesa fetare dhe atdhedashuria që e karakterizonin popullin shqiptar, por që njëkohësisht përkthehet edhe si nxitje për t’i ruajtur këto veçanti identitare unikate të kombit tonë.