Ky studim do të zhvillohet në dy akse kryesore. I pari është sunizmi qendror ose ndryshe qendra sunite, kurse i dyti është dhahirizmi. Nuk është e mundur të shpjegohet marrëdhënia midis këtyre dy akseve në mënyrë të pavarur nga fakti që të dy kanë përmbajtje, kuptime dhe imazhe të ndryshme nga periudha në periudhë. Siç do të shpjegohet më qartë në faqet vijuese, me kalimin e kohës konceptit “Sunî” i janë dhënë kuptime të ndryshme fetare, shkencore dhe ideologjike. Nga ana tjetër, koncepti “Qendër” i referohet një qendre pushteti që formohet në varësi të elementit të mbështetjes nga shumica e myslimanëve (sevâd-i a’zam) dhe autoriteti politik. Ky është një fenomen që nga natyra e tij mund të ndryshojë. Në këtë studim, do të përpiqemi t’i paraqesim vlerësimet tona bazuar në mendimin se qendra sunite ka kaluar nëpër tri periudha historike. Në secilën prej tyre ka pësuar ndryshime korniza, përmbajtja, ligjërimi dhe aktorët e qendrës sunite. Nuk është vetëm qendra sunite që ka ndryshuar në këto tri periudha. Po ashtu edhe dhahirizmi, i cili është boshti i dytë i këtij studimi, ka pësuar ndryshime në varësi të dinamikës së këtyre periudhave. Pra, ajo që ne do të përpiqemi të bëjmë në faqet vijuese është analizimi i marrëdhënieve të ndërsjellta midis qendrës sunite dhe dhahirizmit në tri periudha. Pozicionimi shkencor dhe politik i dhahirizmit nga sunizmi qendror.